وائل صبرى - Wael Sabry - صاحب مطعم بلال وحمزه

ناس كتير بتسال مين وائل صبري وعمل اية عشان يبقي صاحب محل حمزه وبلال احب أعرفكم بنفسي

‎اسمى وائل صبرى..
‎عمرى ٣٥ سنه..
‎مهندس مدنى قسم مساحه..٢٠٠٦
‎هندسه شبرا..
‎الموضوع كان هزار ومجرد دردشه وقلبت بجد وربنا كرمنى..
‎تبتدى الحكايه..

‎اول ما اتخرجت قدمت ف شركه شلمبرجير(بترول) وقبلونى.. بس مكملتش شغل.
‎وقدمت ف شركه سياك شركه انشاءات.
‎وقبلت برضو بس اشتغلت علطول.
‎اول مشروع ليا.
‎مشروع صلب السويس بتاع الجارحى.
‎وبعدين اتنقلت لمشروع ف طريق مصر اسكندريه اسمه ..ستريب مول..البنيان.
‎وبعدين مشروع اليجريا..تابع لشركه سوديك برضو.
‎وبعدين مشروع البوليجون تابع لشركه سوديك برضو.
‎وشويه كده ف مشروع فى القريه الذكيه كان مشروع اظن اسمه b145.
‎وبعدين اتحركت ل غبور الدائرى.
‎ثم دماك اخر شارع التسعين.
‎ثم النهايه ف مشروع الفطيم.. فى الفلل.
‎فالتجمع الخامس.. اول شارع التسعين.

‎بدأت افكر فى انى افتح اى مشروع ولو بـ ١٠٠٠جنية فى مشروع بنيان ستريب مول وخدت القرار فى غبور الدائرى.
‎قعدت مع والدتى وصارحتها بأنى عاوز افتح اى مشروع اجرب فيه حظى.. بصراحه كانت موافقه على غير عادتها.. وطلبت منها توفرلى اى مبلغ على سبيل السلف وطبعا مردتهمش حتى الآن.
‎وفرتلى حوالى ٣٠٠٠٠ جنية او اكثر او اقل شويه بصراحه مش فاكر اوى.
‎واستشرت صديق ليا كان فاتح مطعم واستشرت بعض الناس حواليا كنت أثق فى رأيهم جدا.. واستخرت الله.

‎لقيت مطعم..٢م×٣م.... ٦ متر .. ايجاره ٩٠٠ جنية قدام وندر لاند فى ممر فى عماره.
‎وضبت المطعم بكل الفلوس وملقتش فلوس اشترى بضاعه او اعمل افتتاح..
‎اخدت من امى ٣ كيلو بانيه على ٥ كيلو شيش طاووق... واشتريت ٥ كيلو كبده وزيهم سجق.. وبدأت الليله الكبيره بتاعه الافتتاح بـ ١٠٠ لمبه بس...
‎و خدت تريقه بالعبيييييط  من معظم الحضور.
‎ايه اللى المهندس ده عامله فى نفسه وايه الممر ده.. والافتتاح ده.. حاجه سخيفه ومحبطه اوى اوى.
‎عملت فى الافتتاح إيراد عبقرى حوالى ٦٠٠جنية.. هههههه.
‎ومشوفتهمش تانى الحمد لله.
‎ومشيت الايام بيا.. والمنيو برضو قدامكم.. والوضع مش مظبوط بس اخرى ٢٥٠جنية ايراد يومى.
‎وعدى عليا يوم كان الايراد صفر.
‎بس كان لازم اقف واشوف ايه اللى حيحصل بالظبط اكمل ولا لأ.
‎قبل ما اكمل الباقى.
‎فى حاجه كده حطوها حلقه فى ودانكم.
‎بعد المشوره والاستخاره ده بيكون احسن قرار بعدها... متقلقش.. ربك بيهديك للخير دائما.

‎عرض عليا صديق بس اكبر منى شويتين انه يدخل معايا بالمشروع ده مع انى عرضت عليه قبل ما ابتدى ورفض تماما.. بس جه فالوقت ده وعرض عليا ٣٢٠٠٠ جنية و وافقت وخدتهم ودخل معايا بنسبه ٣٠% وانا ٧٠%
‎وعملنا شوايه فحم بس برضو الوضع فضل زى ما هوا.. عادى يعنى.. مفيش مكسب بس مفيش خساره.
‎كان عدى ١٨ شهر عالوضع ده.. فى الجانب التانى بقا اخويا كان دخل مع صاحبه مشروع اسمه فرينش كريب قعد شهور ومكملوش.

‎فبدل ما يقفلوا المطعم بتاعهم عرضت عليهم اروح افتح فى مكانهم بس بأسم حمزه.. ونبقا ٤ شركاء.. وانا حاجى باللى عندى ونبدأ مشويات مع رز بسمتى مع كريب.
‎ورفعت نسبه شريكى من ٣٠% لـ ٥٠% عشان نبقا كله بنسب واحده.. والنفوس تكون كويسه.

‎بدأنا من جديد وبرضوا عالحديد 
‎الايرادات ضعيفه والوضع عادى جدا وممل.. ومفيش حتى ترابيزه بتتملى من زبون.. واخرنا ٥ اوردرات ديليفرى فاليوم.
‎وقعدنا مع بعض وقررنا نقفل المشروع ده بس صعب علينا السنتين ونص دوول ... فقولنا نستنى واخر فرصه.

‎بدأنا نغير التفكير فى بعض الحاجات... وبدأنا نعمل سندويتشات بسيطه لفتره ٦ شهور.. زى البطاطس والجبنه وبدأت المشويات تتحرك شويه... واخيرا لمينا قرشين... طيب نحوشهم او نوزعهم علينا .. لاااااااا.... فقرييين... قولنا نعمل فرن فطير و بيتزا.

‎وكالعاده اللذيذه برضو مشتغلش وكانت صنايعيه الفطير والبيتزا من الفراغ بتساعد المشويات... ههههههههه
‎بس فضلنا مكملين بستر ربنا وكرمه.
‎وصديق اخويا سلفنا مبلغ وردنهالوه اقساط.. واخويا بدأ رحله السوشيال ميديا بس برضو كانت لسه بالبدايات.

‎وفجأة كده بعد ٤ سنين... صحيت الصبح وكان يوم خميس لقيت المطعم مليان ناس ما شاء الله... مش عارف فى ايه ولا ايه القوانين... الا انها حكمه ربنا سبحانه وتعالى... وبدأ حمزه..
‎وبدأنا لاول مره بعد ٤ سنين نمسك فلوس.. وكانت ٢٠٠٠جنية 
‎والحمد لله ربنا وسع علينا وبقينا ٣ فروع.. والمطعم شهرته واسعه الحمد لله..

‎خلاصه القول...
‎نصيحه..
‎التشاور.
‎الاستخاره.
‎خلى امك تدعيلك.
‎اصبر.. الصبر ضياء.
‎خلى امك تدعيلك تانى..
‎بلاش تبقى موظف.

‎السوشيال ميديا مهمه بس اهتم باللى حتقدمه وخليك مدير ناجح وامين.
‎الفلوس مبتعملش مشروع ناجح ولا بتخليك ناجح دور على توفيق الله ليك.
‎لما تشارك حد نقى اللى تشاركهم بعنايه والأحسن بلاش شراكه.
‎حمزه مشروع صعب اوى متحاولش تقلده.
‎ادعى ربنا كتير وخرج صدقات.. ومتقلقش.

المصدر