أمانسيو أورتيجا.. الخياط الذي أصبح أغنى رجل في العالم
"أمانسيو أورتيجا " ولد في مارس 1936 قبل الحرب الأهلية الإسبانية بشهور وكان أصغر اخواته الأربعة، وبعد الحرب انتقلوا من "ليون" لمقاطعة "لاكورونيا" لما والده لقى شغل في السكة الحديد هناك، وبسبب ظروف المعيشة الصعبة ترك "أمانسيو" الدراسة في سن الـ 14 وبدأ يشتغل في شركة محلية للملابس اسمها "جالا" وهناك اتعلم الخياطة للملابس.
وبعدها بسنتين بس وفي سن الـ 16 بدأت تظهر مواهبه، لما بدأ يلاقي طريقة تساعد عائلته وآلاف العائلات اللي في نفس ظروفهم الاقتصادية الصعبة، فاشتغل وطور في "تعاونيات تصنيع الملابس" اللي مش محتاجة راس مال كبير لكن محتاجة الكل يشارك بجهدة مع شوية تنظيم للشغل، وخلال وقت صغير كان في آلاف الستات سعداء أنهم بينتجوا وبيحققوا دخل لأسرهم.
في 1963 وبعد 10 سنين شغل في "تعاونيات الملابس" قرر "أمانسيو" في سن الـ 26 يأسس أول شركة ليه وسماها "كونفيسيونيس"، وكان مصنع عائلي للإنتاج أرواب الاستحمام وكان هو مسئول فيها عن تصميم الموديلات، واخوه "أنطونيو" مسئول عن الأمور التجارية وأخته "جوزيفا" ماسكه دفاتر الشركة، ودا غير شريكته التجارية "روزاليا ميرا" في الإنتاج واللي اتجوزوا بعد كده في 1966.
قرر "أمانسيو" و "روزاليا"، وفي 1974، أنهم يفتحوا محل لبيع الملابس، ومع نصيحة من والده أن الاسم لازم يكون سهل عشان الناس تفتكره وتحبه كان متخطط للاسم يكون "زوربا" زي "زوربا اليوناني" اللي كان مشهور جدا في الوقت ده، وبعد التجهيزات وقبل الافتتاح اتعرضوا لشكوى رسميه بالغش من محل تاني بنفس الاسم، وبعد تفكير كتير في كل تكاليف التوضيب اللي كانت بحرف "z" قرروا يحول الاسم لـ " زارا Zara" عشان شبابي اكتر وأسهل من الاسم الأول، وفعلا اتفتح أول محل باسم "زارا" في مايو 1974.
"أمانسيو" كان بيحاول طول الوقت يلاقي طريقة يعرف بيها رغبات العملاء المحتملين وإزاي يلبيها بسرعة، لكن المشكلة هي إن أي موضة جديدة كانت بتحتاج حوالي 6 شهور عشان تتنفذ وتوصل الفروع مع مخاطرة أنها متعجبش العملاء، لكن كل ده اتغير لما "أمانسيو" ابتكر بمساعد المدير المالي والخبير في التكنولوجيا " خوسيه كاستالينو" في 1984 مفهوم جديد لصناعة الملابس اسمة "الموضة الفورية"، وده في الأساس نظام لإدارة صناعة الموضة بالكامل عشان يوصل لإصدار جديد من الموضة كل أسبوعين كتطوير للمواسم الأربعة المعروفة لبيوت الأزياء، فالعميل يلاقي شيء جديد مع كل زيارة، فعينوا فريق من المصممين وصلوا لحوالي 200 شخص كل واحد فيهم بيصمم 3 تصميمات جديدة يوميا، عشان إدارة الإنتاج تختار موديل لكل مصمم للبروفات اللي بتاخد يومين كمان، وعلى نهاية الأسبوع يكون بدأ الإنتاج وخلال أيام كمان تكون المنتجات على رفوف المحلات.
فكرة "الموضة الفورية" نجحت لدرجة أن لما "أمانسيو" كان مستني في مرة في إشارة المرور وشاف راكب دراجة نارية لابس جاكت جلد مصنوع يدوي ومطرز بشكل جديد، كان موجود نسخه معدلة منه خلال أسبوع في كل فروع زارا، وده بيخليهم من ناحية يستجيبوا بسرعة لرغبات العملاء وكمان للتغيرات في أذواق المستهلكين والاتجاهات الجديدة خلال من 10-15 يوم بس.
الفكرة أنه بيتم إنتاج كميات صغيرة من موديلات مختلفة تنزل بشكل متوالي وبسعر مناسب، ومن ناحية تانية عملوا اصدارات مختلفة من الموديلات لكل بلد عشان تناسب أذواقهم وثقافهم وكمان مقاساتهم، وكمان عملوا علامات تجارية مختلفة تخاطب الفئات المختلفة من العملاء سواء في السن أو النوع أو الثقافة، فيقللوا مخاطر انتاج كميات كبيرة من نفس الموديلات بشكل بستهلك موارد الشركة.
بدأت "زاراzara" تتوسع وتكبر، وفي 1985 ظهرت "انديتكسInditex " كشركة أم لمجموعة من العلامات التجارية واللي فتح أول فروعها خارج اسبانيا في 1988 في البرتغال، وانتشرت لدول تانية ووصل عدد فروعها في اخر 2016 لأكثر من 7300 فرع، ودا غير نجاح استثمارات "أمانسيو " كمان في مجالات تانيا زي الغاز والبنوك والسياحة والعقارات.
"الموضة الفورية" وصلت "أمانسيو أورتيجا" مع ثروة تقدر بـ 79.5 مليار دولار إلى لقب أغنى رجل في العالم عام 2016، وفسرت "فوربس" هذه القفزة بالارتفاعات الجيدة التي شهدها سهم شركته Inditex، المالكة لعلامات "زارا" و"ماسيمو دوتي" و"بول آند بير.
ليست هناك تعليقات:
إرسال تعليق